招職 富爸爸系列 02

現在係財經新聞報導，「由於美國華爾街股市不斷下跌，道指比年頭累積下跌兩成．受此影響而出現財富效應，美國經濟增長將會放緩，甚至出現衰退．」我想大家一定在財經新聞報導中聽過． 咁，大家識得呢個財經術語「財富效應」點解呢? 不如由我解比大家知，等你地參加百萬富翁時唔會比陳啟泰考起．

即係咁， 每個人都會計住自己的資產， 其中當然包括埋股票投資． 人性好得意，投資的股票升左，雖然未賣出套利，就已經感到自己的荷包脹左，自然心思思闊綽左，駛多左，於是整個社會的消費都多左．所以自己的資產多左，就出現財富效應．對不住，講錯左少少，應該話，自己的紙上資產多左，都已經出現財富效應．

    唔駛講得咁清楚，大家估到富爸爸的作者緊係唔同意呢個財富的定義．富爸爸的財富好簡單，如果你我今天停止工作，你我仲可以過活幾耐？亦可以話就係支持一個人生存幾長時間的能力．作者在９７年寫富爸爸，本書已經作出警告．他咁講：「一九九七年，我知道有很多正要成為百萬富翁的人快要發瘋了。已臨近世紀的尾聲了，我很高興看到人們越來越富裕，我卻仍想提醒一句：從長期來看，重要的不是你搵到幾多錢而是要睇你能留下幾多錢，以及留住了幾耐。」

舉個例子。譬如說你的資產每月可產生五千元收入，可是你每月卻要支出一萬元，咁你仲有什麼財富可言呢？

    富爸爸強調我地唔能夠計工作的收入，因為實際上我地的上一代灌輸錯誤的觀念比我地．我地大多數人害怕失去工作，害怕俾不起賬單，害怕遇到火災，害怕沒有足夠的錢，害怕挨餓，大多數人都期望得到一份穩定的工作。作者話，一份工作能長期解決你的經濟問題嗎？依他睇看，答案是『不能』，尤其從人的一生來看更是如此。我地只是試圖用暫時的辦法來解決長期的問題。」

作者講得好刻薄．他說，一般美國人為一點點錢而勤奮工作，兼一種有工作的虛幻安全感，期盼著一年三星期的假期和工作四十五年後獲得的一小筆養老金。其實美國人都幾好啦，香港人而家先開始儲強積金，又邊有２１日有薪年假，邊有美國咁好的社會福利．美國的經濟可以靠內部消費，但香港完全受外地影響．呢幾十年香港人從未有長期失業問題，但祖國愈繁榮，香港打工仔愈危險．內地咁多平價勞工，即使香港僱主唔申請輸入內地專才，僱主隨時將部分工序甚至全間公司搬入內地，你同我的飯碗保衛戰愈來愈難打．除非內地發展到地價同人工同香港差不多．

富爸爸話，窮人和中產階級為錢而工作，富人令錢為他們工作．下次再同大家講．