招職 富爸爸系列 03

上次我講過，「窮人和中產階級為錢而工作，富人讓錢為他們工作」，有人同我講，緊係啦，錢搵錢，邊個唔知．

    你就錯啦．如果俾Ｄ有窮爸爸心態的人突然發橫財，你估他們可唔可以錢搵錢呢？９６年一月的一期六合彩，當時刷新總投注記錄，頭獎六注中，每注派千幾萬．明報訪問到兩個幸運兒．其中一個在貿易公司做文員，他幾豪氣，話平時受了好多老闆氣，中獎後，第二日就返公司，炒老細魷魚，享樂為上．不好以為他有千幾萬唔開頭，實際上他只係同朋友夾錢買六合彩，只係分得百幾萬，你話玩得幾耐？另一個被訪者亦差不多，完全無錢搵錢計劃，第一時間報團去歐洲的計劃就有．有心理學教授話，中頭獎都未必值得開心，一個無清晰人生目標的人，會變成暴發戶，無心工作，唔辭職都俾人炒，只會盡情享樂，好快打回原型，甚至一沉不起．突然發達亦要個人食得起，否則唔係祝福，只係詛咒．

    問你驚未．不過富爸爸話，其實我地有Ｄ東西仲驚青，只係我地唔知．富爸爸話，見過好多在投資活動中未損失過一亳子的人．我想，富爸爸見識真係不同凡響，真係見人無數，猛人先有咁多機會見猛人．對不起，搞錯了．富爸爸所講，其實你我都遇到．原來他話，見過許多從未損失過一亳的人都係「窮人」，從不投資．唔投資，所以唔會輸．因此我地怕輸的心理，令我地困於現狀．

    上次我地都講過，一般人害怕失去工作，因為怕賬單無錢交，層樓無錢供，怕挨餓，怕問人借錢，怕俾人睇唔起，因此大多數人都期望有一份穩定的工作。
有工作就消除那份恐懼感，一失業就變成世界末日。不過，唔好以為打工仔先恐懼，有錢人一樣會．

    富爸爸話，有Ｄ富人一樣覺得錢能消除無錢同貧困的恐懼，所以積累了很多錢，但他們的恐懼感更加強烈了，因為他們更加害怕失去錢。他有一Ｄ朋友，已經很有錢了，但仍然拚命工作，甚至有些百萬富翁比他們貧窮時還要恐懼。

    除了恐懼感，打工仔仲有一種理財心理病，就係貪婪．沒錢的恐懼會刺激一般打工仔努力工作，當我們得到薪水時，我地的貪婪，我地的欲望就出現，令我們去支付更大的開支，要供更大的樓，供更快的車，分期買更先進的音響器材，去更豪華的度假地點，完全無想過打工絕對不可以提供長期而穩定的收入．於是就形成了一種他稱之為『老鼠賽跑』的模式。即係，起床，上班，找數，再起床，再上班，再找數……其中穿插及驅動的兩種感覺就係恐懼和貪婪。給他們更多的工資，他們就會以更高的開支重複這個圈。
點樣可以脫離老鼠賽跑呢？當然要在收入及支出上想辦法啦．下次開始逐樣講．